Karungut Eko [PDF]

Citation preview

ADAT BUDAYA IMBING BADEHEN Ciptaan : HALIADIE Salamat hasundau je tundah kula Bara kota sampai kan desa Mina mama bakas tabela Anak aken tuntang andi kaka Lampang kanerang anak Burung Tingang Pahayak pahiau kacapi antang Usik panatau ayun tatu hiang Dia tau je nihau hayang Hajamban karungut ikei mansanan Akan kakare tundah jalahan Kalutuh auh batang jalanan Pandumah ikei bara Katingan Ije mambatang jalanan ikei Maimbit angat kasanang atei Manyundau jalahan bara kueh bewei Ayu namunan Penyang Hinje Simpei Kahandak atei ije mambatang Balaku dengan pahari nduang Palampang budaya je tatu hiang Ela sampai je nihau hayang Ayu ketun je anak aken Ela itah sampai mahamen Budaya itah imbing badehen Ela sampai kalah dengan ayun uluh beken Balaku itah sama mahaga Ampin seni tuntang budaya Ela sampai hayang banaya Panatau itah paham baguna



Panatau itah barega tutu Impelai huran awi bue tatu Ela sampai dia haragu Panatau tuntang jawet ramu Amun sampai nihau adat budaya Biti bereng dia barega Sama kilau metu satua Dia kasene buah dengan sala



Bakas tabela bawi hatuwe Ayu itah je himbing lenge Keleh haragu parusik je tege Panatau usik je tambi bue Parusik ayun uluh bakas helu Barega hai paham batantu Keleh ihaga je tutu tutu Akan iwaris awi anak esu Karajin huang uluh nampayah Ampin karamin budaya itah Dengan je beken je dia kalah Sampai kueh bewei dia tau lepah Sampai tuh helu tandak sarita Akan panyeneh je tundah kula Balaku itah je ela laya Mahaga adat tuntang budaya



TANDAK MANDAU Ciptaan : YERSON H.B. SULING



Atun kalampangan je tandak mandau Habangkalan penyang karuhei tatau Pusaka panengan anak kariau Pantas tangking busu jagau Baukir takuluk je tanduk misai Mandau pusaka ayun tambun bungai Pusaka ngalindung lewu hapamantai Pantas tangking pangantai urai Imungkal awi raja bahanyi Ngaragan lewu Luwuk Dalam Batawi Pusaka Bandar tampayah banyihi Halajur hapae manggapung biti Batatah intan je telu duran Mandau pusaka bajama-jaman



Ininih melai Nyalung Kaharingan Kinjap hapan manetek pantan Mandau baasal sanaman lampang Pusaka lampahan je tatu hiang Melai pukung pahewan Antang Sambalut simpei bambang penyang Imulang hapan je tanduk bajang Matei ahang melai puruk bondang Mandau ayun ringkai rambang Pusaka ngarambang utus betang Imenyang hapan gawing haramaung Panenga urai bara bukit Tunjung Dinu metuh nyahu ngaruntung Uka maandak penyang Sahawung Ingumpang hapan kayu garunggang Ukir lamantek hambujur hamparang Ampin Mandau puna marinyang Pusaka Nyaring Balau Bahandang Inali hapan je uei sigi Mandau pusaka puna bahanyi Ulih ngalindung bakunyan biti Palin penyang ingumpang haluli



Mandau bara sanaman mantikei Pusaka habangkalan penyang karuhei Dia inampa kalute bewei Pahayak kahimat hajad atei Bapotai hapan je kayu manang Mandau pusaka Tunggal Sangomang



Eweh mahaga belum tatau sanang Batuah marajaki baumur panjang Mandau pusaka ije sejati Sampai mangagum uluh luar negeri Jatun tandingae ampin kasakti Mamenyang bisak kayu janji Kalute sarita tandak mandau Pusaka penyang karuhei tatau Tau inarawang bara kejau Manumun kahandak anak jagau