Transkip Kitab Ngudi Susilo KH Bisri Musthofa [PDF]

Citation preview

SYIIR NGUDI SUSILO; Suka Pitedah Kanthi Terwilo Dening : Kyai Haji Bisri Musthofa Rembang  Shalatullahi malahat kawakib, ‘ala ahmad khoiri manrrakiban najaaib  Iki syi’ir kanggo bocah lanang wadon, Nebihake tingkah laku ingkang awon  Serto nerangake budi kang prayogo, Kanggo dalan podo mlebu ing suwargo  Bocah iku wiwit umur pitung tahun, Kudu ajar toto kebēn ora getun  Kudu trēsno rēng ibune kang ngrumati kawit cilik, marang bapak kang gemati  Ibu bapak rewangono lamun rēpot, Ojo koyo wong gemagus ingkang wangkot.  Lamun ibu bapak perintah inggal tandang, Ojo mbantah, ojo senggul, ojo mampang  Andhap asor ing wong tuo najan liyo, Tetepono ojo koyo raja koyo.  Gunem alus alon lireh ingkang terang, Ojo kasar, ojo misuh, koyo bujang.  Yen wong tuwo lenggah ngisor siro ojo, Pisan lungguh nduwur koyo jamajujo.  Yen wong tuwo sare ojo geger guyon, Lamun siro nuju moco kudu alon.  Lamun siro lewat ono ing ngarep’e, Kudu nuwun amit serta ndepe-ndepe.  Lamun ibu bapak duko becik meneng, Ojo melu padon ugo ojo nggereneng.  Bab ambagi wektu  Dadi bocah kudu ajar bagi zaman, Aja pijer dolan nganti lali mangan  Yen wayahe shalat aja tunggu perintah, inggal tandang cekat ceket aja wegah  Wayah ngaji wayah sekolah sinau, Kabeh mau gatekake klawan tuhu  Kentong shubuh inggal tangi nuli adus, Wudlu nuli shalat khusyu’ ingkang bagus  Rampung shalat tandang gawe opo bae, Kang Prayogo kaya nyapuni omahe  Lamun ora, iya maca-maca qur’an, Najan naming sitik dadiya wiridan  Budal ngaji awan bengi sekabehe, Tatakrama lan adabe pada bae  Ing pamulangan  Lamun arep budal menyang pamulangan, Tata ingkang rajin kang resikan  Nuli pamit ibu bapak kanthi salam, Jawab ibu bapak ‘alaikumussalam  Di sangoni akih sitik kudu trima, Supaya ing tembe dadi wong utomo  Ana pamulangan kudu tansah gati, Nompo piwulangan ilmu kang wigati 1



 Ana kelas aja ngantuk aja guyon, Wayah ngaso kena aja nemen guyon  Karo kanca aja bengis aja judes, mundak di wadani konco ora waras  Muleh saking pamulangan  Bubar saking pamulangan inggal mulih, Aja mampir-mampir dolan selak ngelih  Tekan omah nuli salin sandangane, Kudu pernah rajin rapi aturane  Ana ing omah  Karo dulur konco ingkang rukun bagus, Aja kaya kucing belang rebut tikus  Dadi tuwa kudu weruh ing sepuhe, Dadi anom kudu rumongso bocahe  Lamun bapak ngalim pangkat sugih jaya, Siro aja kumalungkung ring wong liya  Pangkat gampang minggat sugih kena mulih, Ngalim iku gampang owah molah malih  Ari kala sira madhep ring wong liya, kudu ajer aja mrengut kaya boyo  Karo guru  Marang guru kudu tuhu lan ngabekti, Sekabehe perintah bagus di turuti  Piwulange ngertEnana kanthi ngudi, Nasehate tetepana ingkang merdi  Larangane tebihana kanthi yekti, Supaya ing tembe siro dadi mukti  Ana tamu  Tatkalane ibu rama nompo tamu, Aja biyayakan tingkah polahmu  Aja nyuwun duwit wedang lan panganan, Rewel bae kaya ora tau mangan  Lamun banget butuh kudu sabar disik, Nganti tamu mundur dadi sira becik  Ari kala pada bubaran tamune, Aja nuli rerebutan turahane  Kaya keting rerebutan najis tibo, Gawe malu lamun di deleng wong njaba  Kajaba yen bapak dawuh “hei anakku, Iku turahane wong ‘alim kiyai ku  Bagi rata sak dulurmu keben kabeh, Katularan ‘alim sugih bondo akih”  Niyat iro nuprih berkah wong mulyo, Ora niyat rebut turahe wong liyo



2



 Sikep lan lagak  Anak Islam iki mongso kudu awas, Aja nganti lena mengko mundak tiwas  Luru ‘ilmu iku perlu nanging budi, Adab Islam kudu tansah dipersudi  Akeh bocah pinter nanging ora bagus, Budi pekertine sebab do gemagus  Ring wong tuwa gak ngergani gak ngajEni, Sajak pinter dewe longka kang madani  Jare iku coro nipun sak puniko, Ora ngono dudu intelek merdiko  Ngagem blangkon serban sarung do di gujeng, Jare ora kebangsaan ingkang majeng  Sawang iku pangeran diponegoro, Imam bonjol tengku umar kang kuncoro  Kabeh podo bela bongso lan negoro, Pado ngagem destar pantes yen perwiro  Gujeng serban sasat gujeng Imam Bonjol sak kancane, hei anakku aja tolol  Timbang gundul apa ora luwih bagus ngagem tutup sirah kaya raden bagus  Kala-kala pamer rambut sak karepmu, nanging kudu eling papan serawunganmu  Kumpul mudo beda karo pul yahine, nuju sholat gak podo melancong nujune  Ora nuli melancong gundul, shalat gundul , sowan moro tuwo gundul, nguyuh gundul  Cita-cita Luhur  Anak Islam kudu cita-cita luhur keben dunyo akhirate biso makmur  Cukup ilmu umume lan agamane, cukup dunyo kanti bekti PengeranE  Biso mimpin sadulure lan bangsane tumuju ring raharjo lan kemulyanE  Iku kabeh ora gampang leksananE, lamun ora kawit cilik tocitanE  Cita-cita kudu dikanthi gumergut, ngudi ilmu sarto pekerti kang patut  Kita iki bakal tinggal wong tuwa, ora kena ora kita mesti muwa  Lamun kita podo katekan sejone, ora liwat siro kabeh pemimpine  Negaramu butuh menteri butuh mufti butuh qodli patih setin lan bupati  Butuh dokter butuh mister ingkang pinter ilmu agomo kang nuntun laku bener  Butuh guru lan kyai kang linangkung, Melu ngatur negarane ora kethung  Iku kabeh sopo maneh kang ngayahi, lamun ora anak kito kang nyagohi  Kejobo yen siro kabeh ridlo mbuntut, selawase angon wedus nyekel pecut  Siro ridlo goncek cikar selamine, kapir iro mentul-mentul lungguhane  Ora nyela angon wedus numpak cikar, asal cita-cita ilmu biso nengkar  Nabi kito kala timur pangon mendo, ing tembene pangon jalmo kang sembodo 3



 Abu Bakar Shidiq iku bakul masar nanging nata masyarakat ora sasar  Ali Abu Thalib bakul kayu bakar nanging tangkas yen dadi panglima besar  Wahid Hasyim santri pondok gak sekolah dadi menteri karo liyan ora kalah  Kabeh mahu gumantung ing seja luhur, kanthi ngudi ilmu sarto laku jujur  Tekan kene pungkasane syiir iki, larikane wolu limo kurang siji  Muga-muga seja kita sinembadan, dening Allah ingkang nurunake udan  Pinaringan taufiq serto hidayah dunyo akhirate shihat wa ‘afiyat  Amin amin amin amin amin amin fal hamdu lillahi rabbil ‘alamin 



KH. Bisri Musthofa, Rembang, Jumadil Akhir 1373 H



4