Hata Hata Pembukaan Pertemuan Mupakat Mengadakan Pesta Di Mandailing [PDF]

Citation preview

HATA HATA PEMBUKAAN PERTEMUAN MUPAKAT MENGADAKAN PESTA DI MANDAILING. (HATA HATA TUAN RUMAH) - HOBAR NI SUHUT DI PARPOKATAN ORJA. Assalamu alaikum ww. Alhamdulillahi robbil alamin. Puji syukur hita ucapkon tu hadirat ni Allah swt, na madung mangalehen marmocom-mocom hadengganan na bahat di hita, boi ia tagini kesehatan, songoni kasampatan di hita sasudena, sahinggo ita sude koum markoum, dapot sarap lagut di haratak siriaon on.Satorus nada ngana lupa hami mangucapkon sholawat dohot salam tu baginda nabi besar Muhammad saw. Na marbunyi: Allohummasolli ala saidina Muhammad, waala ali saidina Muhammad. Na ita haropkon syafaatna, sian dunia on, torus tu ari na parpudi. Bahat hormat nami, marsantabi sapulu. Manghadopkon sudena suhut marangka maranggi i son. Songoni anak boruna songoni mora, mora ni mora, songoni hatobangon dot nai patobang. Sumurung lobi tu jejeran ni amanta guru-guru. Songoni buse dohot hita na dua tolu na hadir marpungu i pantar siriaon on. Taringot di dalan dalan ni parpunguanta di haratak on. Ngada lain di munyogot ni ari i. Madung sompat ami suru doli doli undangan podang. Ima na madung manekteki pintu ni koum nami sada parsada. Na mangoban taon, suada alanganna rap lagut do hita di haratak on, dung salose sumbayang Isya. Satorusna da baen madung sompat do adong burangir, na madung ipataya taya ni anak boru nami. I son mada hami marsapa tu adopan ni mora nami. Tarlobi-lobi tu barisan ni hatobangon. Sanga bolas do rohai. Molo hami pasurdu burangir nami. Harani aha do rohai i? Harani adong hata na get patujoloon. Anggo ning roangku da, songoni mada hata sian au. U sudahi ma dohot salam. Assalamu’alaikum ww. Setelah ini, Mora lah yang akan menjawab hata hata in JAWABAN MORA, BILA SUHUT TELAH MEMBUKA PEMBICARAAA DALAM MUFAKAT PESTA Assalamu alaikum ww. Alhamdulillahi robbil alamin. Puji syukur hita ucapkon tu hadirat ni Allah swt, na madung mangalehen kesehatan dohot kasampatan di hita sasudena, sahinggo hita sude koum markoum, dapot sarap marpungu di haratak siriaon on. Dungi nada lupa hami mangucapkon sholawat dohot salam tu junjunganta nabi Muhammad saw. Na marbunyi: Allohummasolli ala saidina Muhammad, waala ali saidina Muhammad. Na hita haropkon syafaatna, sian dunia on, torus tu ari na parpudi. Olo ia tutu mada. I dia nangkin binege, dalan-dalan ni parpunguanta di haratak muyu on. Ngada lain di munyogot ni ari i. Madung sompat isuru homu naposo bulung. Na mardalan dua sauduran. Ima na manek-teki pintu ni koum muyu sada par sada. Na mangoban taon, suada alanganna, rap lugut do hita sasudena i haratak muyu on, dung salose sumbayang Isya. Mangaligi on. Homu suhut sasudena, manyambut boti margodang marlomo ni roha di haroro nami on.



Taringot napaduana, nangkin ami bege, ambaen na madung adong burangir na madung ipataya-taya ni anak boru muyu. I son nangkin ro sunggul sapa muyu tu mora na adong di bagas on. Anggo ning rohangku da. Ngada adong hambat janggal ni ibe. Ambaen na madung adong do sude koum kahanggi muyu i son. Songoni mora dot mora ni mora muyu. Songoni barisan haguruan, tarlobi-lobi hatobangon. Surdu homu mada burangir na madung sompat isadioon komui. Anso laos marjamita homu. Olo ia tutu. Na peto ma on sudena dalan muyu on. Na madung adong do on sunggul sapa muyu. Leng hami suru mada, pasurdu homu ma burangir muyu. Hobar nami on, tandona mei na madung adong sumambut nami. Ami tarimo burangir muyui dohot godang asa lomo ni roha. Usudahi ma dohot salam. Assalamu’alaikum ww. HATA HATA SUHUT KAHANGGI, SETELAH BURANGIR DIPERSEMBAHKAN KE MORA. Tulisan dalam kurung di bawah ini, terkadang tidak diucapkan lagi. Sebab tadi pada pembukaan pembicaraaan, telah dibacakannya. Tapi banyak juga orang yang mengatakannya untuk kedua kali. (Assalamu alaikum ww. Alhamdulillahi robbil alamin. Puji syukur hita ucapkon tu hadirat ni Allah swt, na madung mangalehen kesehatan dohot kasampatan di hita sasudena, sahinggo hita sude koum markoum, dapot sarap marpungu di haratak siriaon on. Dungi nada lupa hami mangucapkon sholawat dohot salam tu junjunganta nabi Muhammad saw. Na marbunyi: Allohummasolli ala saidina Muhammad, waala ali saidina Muhammad. Na hita haropkon syafaatna, sian dunia on, torus tu ari na parpudi) ……Bahat hormat nami, marsantabi sapulu. Manghadopkon kahanggi, anak boru, songoni mora, mora ni mora. Songoni hatobangon dot nai patobang. Tarlobi-lobi tu barisan ni haguruan. Dohot umumna sude hita na hadir di bagas on. Olo ia boti. Songon na marjami hami sotik jolo. Songoni mada di dalan-dalan ni parpunguanta di borngin ni ari on. Ima mantaringoti gadis nami na sian bagas on. Di si mur magodang ni pamatangna. Ma lak tama tupa ma rupa ibana mamolus panibalan ni hata. Songoni juo ni halak ni parkulahanna. Ima na sian Lumban Dolok. Isi mur magodang ni pamatangna. Mang lak tama tupa ma rupana ibana mamolus paradatan matobang. Songoni mantong di ari nasolpui, madung sompat do ilehen simatobangna tutur dohot poda tu ibana. Anso ibana mamolus paradatan matobang. Rupa rupa nii, martarimo do tondi tu badanna., Mardalan ma ibana di bona ni bulu ni hutana. Manjalaki rongkap ni tondina. Tai songoni mada. Nada tarpili tumpuk. Nada tartolok bagian. Nalangka ma ibana marsituntun, patantan simanjojak, pangayung alang simangido. Na topet ma rupa ibana, ima di napa-napa ni hutan taon. Sasampe di hutantaon, ngada ibana jomak jomak so marbudi. Na ingot do ibana di pituah ni ompunta na parjolo sunduti. Di dia adong rura, di si adong mali mali. Di dia adong huta, di si adong kahanggi. Di topot ibana ma kahanggi, na madung onok marmeyam di huta on. Sareto dioloskon ibana ma tu kahanggi, bahaso ibana get



mamolus paradatan matobang. Songonima simpul ni hata, kahanggi pe martoruk abara do nian. Sareto mandokon, mulai sian on, sampe tu sodun. Ima banjaran ni moranta. Pamata-mataima sanga dia na laek isolong ni matamu. Ning kahanggi ma tu ibana. Songoni ma antong di ari na solpui. Madung sompat ma ibana mardalan-dalan, ima di hutantaon. Dungi tarida ma di ibana, ima gadis nami na sian bagas on. Na baru mulak sian pancur paridian. Na junjung talokongna asa sandang barigitna. (Sian tapian raya bangunan. Untuk keturunan raja raja).) Sareto isapa ibana ma. Sanga madung adong igolom-golom gadis nami, hata ni halak na lebam. Mangalus ma gadis nami na sian bagas on. Anggo sapambotoan ni rohangku da. Muloi na solpui sampe sannari, nga adong. Ning gadis nami ma tama dokonon. Sareto isangkutkon ni anak parkulahanna ma hata lidung tu gadis nami. Sanga na ra sangkut marpaya, sanga nara dongan saparuntungan. Mangalus mada gadis nami na sian bagas on. Padahal di pangalaho anso iboto ho abang. Godang do rohangku pabege-bege habar mon. Ijagit ngada tarjagit, itulak ngada tar tulak. Harania aha i? Ibana on na dipagodang ni simatobangna asa igom-gom ni paradatan. Ning gadis nami mada tama dokonon. Dungi mangalus ma anak ni parkulahan na mandokon bahaso, ibana pe angkon na sapambotoan ni simatonbangna do. Rupa songoni mada, anak ni parkulahan pe mulak ma tu jabuna. Ibana pe parmisi ma mulak tu hutana. Songoni ma pangalahona. Sasampe ibana tu bags ni ibana. Ima I Lumban Dolok. Ijamitaon ibana ma tu simatobangna. Bahaso madung adong sangkut ni hata ni iabana. Ima dohot gadis namion. Rupa songoni mada, na madung rap marsimpolu do on antara hami dohot anak boru nami na sian Lumban Dolok. I bagasan ni i, ami baen mada sada pajanjian. Angkan na ro halai manyaloseon sada paradatan. On ma i borngin ni arion, anso ita baen parpunguan on. Na madung ami jamitaon do sude tu koum kahanggi nami, songoni anak boru, mora, mora ni mora, bope jejeran haguruan. Anso rap lagut hita sasudena, i pantar siriaon on. Jadi on mada anso hami sapa. Sanga laek tarpainte dei haroro ni koum nami na sian Lumban Dolok on. Jadi tarsaima hata sian au. Baen ison do da anak boru nami, na bisa patama patupa hobar on. Mompas ma hata tu anak boru nami. Usudahi ma dohot salam. Assalamu’alaikum ww.



(JAMITA I) Jamita Hasolkotan Assalamu’alaikum Wr.Wb Pertama-tama mari hita panjatkan puji syukur tu Tuhanta namarkuasoi harana ni aha, di lehen dope di hita nikmat kesempatan, hita dapot marlagut jana marpungu di bagas namartua on. Songoni salawat dan salam tu arwa ni Nabi besar Muhammad Saw. Mudah-mudah an disyafaatkon ibana hita di hari naparpudi. Sattabi sappulu sappulu noli au marsattabi tu tua sahala ni hita namarkoum marsisolkot ima natardiri sian Kahanggi, anak boru, mora, natobang, songoni hula ni banua raja. Apalagi di opputta Raja tobang nasian bagas godang pada umumna hita namar lagut di bagas namartua on. Attong baen naro hami di borngin ni arion, ima namar kahanggi, maranakboru, marnatobang songoni namarraja baen na adong maksutna, ipe hupabanjar jolo saotik, sian pakkal lopus tu ujungna. Ima taringot di anak nami nagodang pamatangna namuba di pangalohona. Nian hami ngada lupa ngada lolos manuturi na dohot hata poda-poda songoni sipaingot, muda lakkaho amang tu banua ni halak. Ulang so jamor-jamor, batuk-batuk do laho tu bagas jou-jou laho tu tapian, ninna do hata nipoda maradopkon anak nami, tai bia daganak sannari doppak dijoloniba olo, tai dung lopus roha ni diparrohaima taringot di lakka-lakka ni anak napatatatkon simanjojakna napagayung olang ni simangida manjalak-jalaki ulu bondar namartua, rupa saatma tu huta ni mora on ima ima tano pattis tano barerang ni ................ di son taraida di ibina gadis ni morana nadung di godang pamatangna sian I tubuma niat nadengan di bagasan roha ni anak nami on ale gadis ni mora nadung godang pamatangna padema akkup jumben sodu-sodu ni pematang nadung magodang maginjang songoni songgopan ni tua ninna dei. Satorusna dipuragai anaknamima tu gadis ni mora mengandungkon jana makkoloskon ima di lidung masa martudosan nasasue dohot hatani umpana : Situmbur ni sindulang ibotohon ni langge Si boru ni tulang iboto ni tunggane Radeho akkup ni tali pangarauti ni sopo soban Radeho dongan martahi akkup matobang Disi dung-dung siala gadis ni mora satorus ni dioban anak namima tubagas nami ima di SIOLIP dison tarsonggot buragan di pangalaho harana manurut sasomalna, samulak ni anak sian parmayaman ngadong namasa namuba mudape mardongan dongan sabayana do tai di ari nadung solpu samulak ni anak sian parmayaman gurpak-gurpak tubagas nami di buka pittu gaja manyokkir, tarpaidamai anak nami ima namaruduran si suan pandan, di sonda di sambut do mulai sian halaman silang seutang, dipanaekkon mulai sian pakkal tangga ni sikkang bayo, marsirutcur di alang jaring jattan di pajuguk tu hala hulu tunggang bosar. Di sonda romai arsak ni roha songoni lomo ni roha hiparlagutkon ma kahanggi anak boru songoni hombar balok di si dapot do buhul ni tahi ngada tarpasip kita on tai muda hutatap na marlagut on nahum hita nasapanggadongan dopeon harana hita namarkuta, nadi gobak ni raja, nadi parorot ni natobang, akkon nahita parlagutkon do halai di sada maso, di sida dapot do hami parlagutkon maraud natobang songoni raja, ima dalam marjamita, di lakka-lakka ni anak songoni gadis ni moranami, disi dapot mei marsisambut kahanggi, songoni natobang lalu tu hula ni banua raja, disapa daganak nadua simanjujung aha tuttun tinopotna romadai alus ni gadis ni moranami, di harorokku nagito manopotkon si FULANsongoni namboru dohot amang boru songoni muse alus ni anak nami, nauban maon gadis nimora, nagito rokkap matua bulung pakeon sepanjang mangolu tanaman laos mate satorusna dapotma di pudun raja. Di goarmaon boru ro masukma tugolongan ni masyarakat di kandung paradaton di halan bondul na opat palima lima panggalang, tinggal dei huta JANJI LOBI dohot SIOLIPnamarkoum nalolot mulai najolo lopus sannari umpama ni tano tano sabbika, umpama nih ayu anggo adong hayu nagiccat sabukkulan dope bagasta. Boti di hita do tamba di moratta urakna dei, ulang romarsilayasa api gara api dijombaan. Atcoto muda bitcar mata ni ari lakka mahamu sada kahanggi sada anak boru. Marpaboa tu anak boru muyu mora pembuatan ninna.



Attong hara niima baen naro hami di borngin ni arion songononma hami namarjamita bahaso gadis ni morakku, namago sian bagaso ngadabe nalalat di parsobanan, takkas madai nadioban ni anak nami tu bagas nami di SIOLIP madung tarsahat tu natobang. Godang situtu harop ni roha nami. Anso sude nian maraud morakku markahanggi songoni anak boruna dapot menyambut manarimo di hal jamita nami on. Sai ma hatana sian au urang dohot lobina au mangido moop mangido izin.



KAHANGGI Mangudorkon Jamita Hasolkotan Bahat-bahat hormatku tu tua sahala ni hita na markoum marsisolkot, terdiri ma sian dalian natolu ima Kahanggi anak boru, mora satorusna natobang pangait pangatogu ni banua songoni muse hula ni banua raja. Napataya-taya adat, uhum dohot ugari, hamuliaon ni hata tu oppui raja tobang nasian bagas godang nahadir di borngin ni arion. Songon namangudurkon hata ni kahanggi sangape ama, nabanjar songon jegang baris-baris songon ema, ima namanyungguli lakka-lakka ni akan najalak-jalak di rokkap ni tondina nagiot dongan saliak salandakan sabukkus jana sarodang-rodan pendeknya udut ni tangan napondok di ina tamba ni gogo di ama. Muda satottang sipaingot takkas dei di lehen hata poda-poda, huik-huik halilhi melamun salak di bonana, di patukki do aman panaili muda iba halak naso di luatna ulang hilap-hilap songon naso malo makkuling songon-songon parsappur ni pisang gasgas saratna luas saratna malakka. Rupani, tutu dei muda daganak sannari rodei songon hata ni uppma, muda di urbat sinduduk bulung nai marmare-mare muda dung pauduk-uduk leng rohana marparange. Sasue mei di laho laho ni anak di ari nadung solpu ima tu napa-napa ni JANJILOBI on takkas mei songon nadi pabanjar ni ama. Ima parsuoon ni anak dohot gadis ni morana disida diandungkon ma jana di oloskon, iman a tarsitta dibagasan roha ima nagiot membina sada rumah tangga. Disi dapot madai di alusi gadis ni morakku Di susuk ana si mata Obanon tu mandalasena Ngada dai mambaen sala Anggoma jalak tu padena Sian i lupa madai anak nami diata ni poda, harana ni roha natarlomo-lomo maradopkon gadis ni mora, ngadabe tarsuhat di bagasan roha, bo diaban namada tu bagas nami ima di SIOLIP Di sida sasue dei nadi pabanjar ni ama. Di sambut dei di saluangi di pajuguk di amak na dengan, di sonda dipaligi ligima parjuguk ni daganak nadua simanjujung, romada lomo ni roha songoni arsak ni roha, di sida hami jamitaon dei mulai sian pattar tonga satorusna tu pattar bolak disida takkas marsisambut maradu natobang, tinggal dei hula ni banua raja di sosotan dei daganak nadua simanjujung, ima di pangalaho di harorona rodei alusna saluppat saindege mangalakka matua bulung, mambegeon di paebang raja madai hata, di goarma bahaso pendekna namuba ma on di hita, di lehen ma sattan pamborgo-borgoi. Tinggal ulang sompat halai jalak lalu jalak tibo hamu. Lakka ma tu mora muyu mora pembuatan. Attong hara ni ima baen narohami di borngin ni arion. Marpaboa bahaso gadis ni mora nami, madung di bagasi nami. Nahami tinggalkoni torusda dohot gogo ngada adong namasa namuba. Boti ma namangudurkon hata nikahanggi tinggal di son dope anak baru sitamba nahurang si orus nalobi tukkot di landit sulu di nagolap halaima manambaina. Wa’alaikum salam wr. wb.



ANAK BORU Mangudorkon Jamita Hasolkotan Bahat-bahat hormatku tu tua sahala ni hita namarkoum marsisolot tardirima sian kahanggai anak boru, mora songoni mora ni morakku bo kahanggina, satorusna anak boruna, apalagi natobang, songoni muse hula ni banua raja, hamuliaon ni hata tu opputa raja tobang nasian bagas godang. Sauduran dodai hata dohot morakku suang mei songon namangite di gincang gadu, takkas mei bahaso tulang naposo nadung godang pematang na, songoni lakkana namuba markoti sian nabiaso muda satottang hata poda-poda tutu dei nadi banjaran ni mora, amang baen madung magodang maginjang pamatanmu, ngada salai di patobang pangalaho. Tinggl muda lakkan tu huta ni halak di obankon do tutur dohot base ulang ro ibot gabe boru tulang nambujing gabe namboru, kahanggi gabe mora muda tapian ulang saratna di laosan muda bagas ulang sartan gurpak-gurpak muda majolo nmardalan ulang onggak, ular o songon parjongjong ni eme nalambang dumenggan dei diunduk, songon pangunduk ni ema na marisi, tinggal di ari nadung solpu sasampe ni lakka-lakka ni tulang naposo tu huta ni mora ni moraon dison marsuo dohot gadis ni morana dipatakkasma jana di patorang di andungon jana di olosoloskonima na tarsitta sitta dibagasan roha nagiot mangalakka matua bulung dohot borkat ni laho-laho ni tulang naposo dungdung sialamada gadis ni morana si sianu lupa mada tulangnaposo halani poda di oban namadi tubagas ni morakku ima di huta Siolip sian arsak ni roha songoni lomo ni roha ima mangaligin parjuguk ni nadua simanjujung nadi pajuguk di juluan di ginjang ni amak nadenggan songondadai anak ni raja, dohot boru ni raja. Sian takkas mei diparlagutkon morakku, kahanngin dongan martahi hami anakboru na pangidoan gogo, mormna pangualan ni bisuk di si buhu mei tahi muda songono di harorona habar-habar matuson songoni hasabatan, haranii akkon nahita parlagutkon do maraud natobang dohot raja. Ima dalan marjamita. Salaos marguru disi dapot dei diparlagutkon mudah-mudahan dapote mei marsisambut apalagi raja di goar madai boru ro. Tinggal ulang sompat mar bona bulu mardongdong bona ni tiang jalop tibu hamu lakka marpaboa tu moramuyu mora pembuatan, tutu mei nadi pabanjar ni mora haranima baen naro hami di borngi ni arion attong dia pangidoan ni morakki, nadohot pangidoon nami mei sian anak boru. Botima hatana. Wa’alaikum salam wr. wb.



ALUS NI JAMITA I



Assalamu’alaikum wr. wb Bahat-bahat hormatku tu maradu koum sisolot naadong di bagasn nadi jalin ni parmudaron nadi baris ni tutur tarombo terdiri ma isian kahannggi anak boru, mora natobang songoni hula ni banua raja, satorusna koum nami naro di borngin ni arion, amuliaon ni hata tu oppu nasian bagas godang. Inda baen namanumbas tinggal menyambut hata muyu koum nami naro di borngi ni arion, muda majolo bona-bona ni hata, sasue mei sia jamita muyu ima namanyungguli lakka-lakka ni anak muyu di ari nadung solpu, ro dei dosar ni tarottok ima di pangalaho ima taringot danak nadi bagason muda manurut nasomal. Muda potang si dumadang ari jalopdo ibana membuat gobak-gobak muda kehe tu bilik pedoman nia sangape manjoloi abit sumbayangna muda kehe pangajian di torang ni ari, jalopdo ibana mula tubagason manologni inangna di dapur manjam natupa di tangan na tai di ari nadung solpu ari madung gitcat ibana ngada mula tubagason di jalakan mei mulai sia sapuman nabolak songoni pahae tapian pulu tapian, apalagi dongan saparmayam, di sapaan do dai, ngada adong tarpaida di ibana sian harani i marlagut madai hami kahnggi, anak boru, songoni hombar balok dipumu ni tahi salakkon anak ni manuk ciok-ciok terlambat mardaek dijalah, apalagi jolma manusia, tai dihita namarlaguton hahun sapanggodangan dopeon hara ni ta namarkuta do nadi gobak ni raja nadi parorot ninatobang akkon nahita parlagutkon maradu natobang akkon nahita parlagutkon do halai disada maso. Disi dapot dohami parlagutkon maradu natobang apalagi raja, ima dalan nami disi dapot madai marsisambut, tinggal lalu tu hula ni banua raja diparulakkon sapa-sapa tuhami, sanga adong do barang na muba naso barang nami di bagason.



Disi dapotma di patidaon tujol ninatobang, disonda daptoma dibaca opputta raja anggo manurut tanda-tanda ono nadioban ni anak ni koum doon nasion jae sanga nasion julu nalakka matobang. Attong ngada be lomos ni roha on, harana muda magodang anak dipajadihon dohot boru, muda magodang da boru di pabagas. Tai satakkas disonda anak boru di sapai majolo. Disi dapot do di akui anak boru bahaso. Buat-buatan ni ibana. Tinggal di lehen di au partagguan muda nadonok dua kali tolu hari, muda nadao dua kali pituari nikkalai. Mudah-mudahan dapot dilehen raja rupan ngada podo jabat dua kali tolu hari madung rohamu di borngin ni ari marjamita tu hami mora muyu di borngin ni arion marjamita tu hami mora muyu. Bo biadope majeges dai penyakit malum ubat ro. Hami na agoan hamu paboan. Tai muda lakka-lakka ni danakon madung saat sanggal doon tu natobang muda ngada sasue pakkobaranna dohot halai, ulang pindaon komu bagas podomanna anso topot alapan nami. Botima hatana mambalos hata muyu i. Wa’alaikum salam wr. wb.



ALUS NI ANAK BORU Jamita Hasolkotan Bahat-bahat hormatku tu tua sahala ni hita namar koum marsisolkot. Tardirima sian kahanggi anak boru, mora, songoni mora ni morakku bo kahanngina. Saturusna anak boruna, apalagi natobang songoni muse hula ni banua raja hamuliaon ni hata tu opputta raja tobang nasian bagas godang. Mangudurkon hata ni mora, ima namambalosi hata muyu kahannggikku naro borngin ni arion, ima namanyungguli laho-laho ni gadis ni moratta, na maruba markoti sian nabiaso, muda majolo sasomalna muda potang sidumadang ari jalopda gadis ni moratta tu bilik pedoman, sang ape tu pangajianna, di torang ni ari mulak do gadis ni moratta tubagason manjami natupa di tanganna, tinggal di ari nadung solpu ari madung gitcat, angin samarombus udan somadabu ibana ngada mulak haranii arsak madai roha ni moratta, di jalakanma tu pancur jae songoni tu patcur julu di sosotan dongan sapodomanna ngadong tarpaida. Sian i dipalagut morattama kahanggina dongan martahi songoni hami anak boru pangidoan gogo apalagi morana pangualan ni bisik. Disi pumumadai tahi akkon nadijalakan, harana ulang majolo pahan-pahanan terlambat mardaek di joljoli doi. Apalagi jolma tinggal ro pitua ni mora harana ita namarbona bulu, nadi gobak ni raja, nadi parorot ni natobang ita parguruon jolo tu halai, muda songonon di harorona didia akkalna idia ultopna, dia hatana, aha nadi dokna, di si dapot madai di palagut natobang songoni raja, songoni muse barang namaruba na sobiaso di bagason. Dapot do dipatidaon tujolo ni natobang, manurut tando-tando on nalakka matua bulung dei ning raja. Tinggal sarap takkas di sondo anak boru disapai jolo halai ninna. Disibotulma, hami alusi de isian anak boru anggo natarpayakon barang nami anakboru maon, buat-buatan nidaganak ku dei, tinggal anggo dibagas laos miur nakkin ngadong namasa namaruba, pinggan nami pe inda adong na doter, apalagi anakku namenek nai ngada podo sikola. Muda nagodang nai di ratto ni alak, tai nabahatdo kahannggikku di jae songoni di julu di lehen jolo partangguhan di au, dua kali tolu ari pula nadonok, dua kali pitu ari pula nadao. Muda ngada ro kahanggikki au madai marpaboa tu moratta songoni anakboruna. Majeges dei hami najalak lulu hamuro marpaboa, suang mei sige tumopot bargot, tinggal muda ngada sasue pakkobaranna dohot natobang tai ulang hita marsiupatan ualan adong dalan ni pardosaan songoni paridian dohot podomanna ulang pindahon komu, asa topot alapon nami. Botima hatana namangudurkon hata ni mora. Wa’alaikum salam wr. wb.



MAMAYAKKON PAKKAL-PAKAL NI ADAT Assalamu’alaikum wr. wb



Bahat-bahat hormatku tu sude hamu maradu morakku di bagason bo kahanggina apalagi anakboruna songoni mora ni morakku satorusna natobang apalagi opputta raja nasian bagas godang nahadir di bagas na martua on. Markabotulan madung rodo hami di ari nadung solpu ima namarkahanggi maranak barou songoni marnatobang maradopkon mora nami di bagason, marjamita secara hasolkotan marpaboa ulang agoan bahaso parserean ni morakku namago sian bagason ngadadai nalalat di pandurungan sanga nalilu di pattcalongan natakkas natutu dei nani oban ni anak tu bagas nami nadung tarkanung dei di paradatan terhalang di bondul na opat pendeknya nadung tarsaat di natobang mudah-mudahan on sude madung dapot doon di alusi maradu morakku. Kahanggina songoni anak boruna tinggal lalu tu natobang anggo taringot di jamita muyu on da madung dai sampe tu hami tinggal yakin do hami tai urang porcayana ulang ro songon namarsimonjap di situmudu sangape namarhonding handing di sutualang muda ro hamu. Payakkon komu tanda-tanda songoni buktinya bahaso jagar-hagar ni opputta raja tobang nadung saat sanggal di paradaton di huta muyu siani mulak mahami tu tepak parburangiran dipalalu lahirna dibagas sian dalan magodang disi buhul madai tahi akkon nalakka jalop tibu harana pakkal-pakkan ni adat maon. Sinapang mei sartan ambaen gambaran ni opputta raja na sian PARINGGONAN harana ni dipaittema ari naum sigat ima di haroro nami di bornginon parjolo jolo suman doma burangir nami sirara uduk sibottar adop adop salaan sora busuk sebulan soramalas, manyonggopi anak ni raja songoni anak ni mora. Taringot di maksudnya songoni mahami namamayokkon pakkal-pakkal ni adat. Sinapang nadenggan so dipatikma dua dogoman sada artina dua nadidokna. Muda pati na parjolo songonan ma hami namangido moop mangido izin ima littas baroba ni anak najamor-jamor harana muda anak tarlubang ama doi manattari, muda anak namarutang ama do makkobari, songi muse di patik na paduaon songona juo mahami namangottcat lakkani ulu balan ni raja ulang be jalak lulu dina agoanna. Pendekna : Unduk-unduk bona ni siala Ulang nian ami munduk tu roba-roba Alak namunduk mangaku salah Ulang nian soppat ana torla Haraniaha Siala namian sian kola medan Suan on mai tu roba-roba Salana mion di baen nian sila madenggan Atso mago arsak ni roha. Saima hatana sian au tai disonda kahanggi songoni anak boru apalagi natobang alaimoma namanambana sotama tu tujuanna. Wa’alaikum salam wr. wb.



KAHANGGI MAMAYAKKON PAKKAL NI ADAT Assalamu’alaikum wr. wb Bahat-bahat hormatku tu maradu morakku markahanggi songoni anakboruna satorusna tu mora ni mora, songoni natobang dohot hula ni banua raja hamuliaon ni hata tu opputta raja tobang naro sian bagas godang nahadir di bagas namulia on . mangudur sian hata ni kahanngi muda majolo dalan ni api namartimus songon pakkal-pakkal ni hata. Takkas mei ima di haroro nami di ari nadung salpu marpaboa jamita hasolkotan bahaso dihamago ni gadis ni morakku na sian bagason ngadai nalilu di parpandanan, takkas tutu dei nadioban ni anak dei nagiot dongan mabugan marlilit, mago marlulu. Songoni di borngin ni ari on napasuang poda-poda ni raja ima namamayakkon bosi saolanggun ima sarat sala-sala dalan ni tangan mar sijalangan harana mangido maaf mangido ijin ima taringot di anak nami na lupa di hata nipoda ima najamor jamor di pangalaho tuhuta ni moraon. Mudah-mudahn nian attus pangidoan ni kahanggi sangape ama satottang sala-sala ni anak dibaen madai jolo sala madenggan harana :



muda ambeng di mandurama maramakkonme tu andurian muda hamu dipadenggan hamu dimulana dumenggan mei di tuapudian misalanna mei bulung ni lappoyan di loppit dua sabolahan ulang majolo di lang lang panyusayang anso lolot no mai ingoton Muda satottang namangoccot ulu balang ni raja marpangido madai tu rajai di palu jala membege hulu balang ni raja ansa mulak tu halai tu humaliang humalah ni sidang paradaton. Anso dapot namai mambege di jamita namion. Ima diborngin ni arion bahaso di haroro nami tutu mei namaku sala-sala. Attong sikkam mada jolo Pisang siolot hita barbari Saimada jolo hata nami Namangudurkon hata ni kahanggi Wa’alaikum salam wr. wb.



ALUS NI PAKKAL-PAKKAL NI ADAT Assalamu’alaikum wr. wb Pertama-tama puji syuku tu tuhanta namarkuasoi di lehen di hita nikmat kesempatan , songoni kesehatan jasmani dohot rohani sehingga hita dapot tertatap muka antar namarkoum marsisolkot lagut jana pungu di bagas namartua ono. Songoni salawat salam tu arwah ni nabi besar kita muahmmad saw mudah-mudah an di sapaatkon hita di ari naparpudi. Salain sian I bahat hormatku tu maraud kahanggi songoni anak boru apalagi mora, natobang hula ni banua raja satorusna kum nami naro di borngi niarion amuliaon ni hata tu opputta raja tobang namaniop tano muara, dolok natimbus tono nanapa. Ulang majolo mambalosi hata muyu songoni bona-bona diparsuanta sasue mei di haroro muyu di ari nadung solpu namarjamita secara hasolkotan, marpaboa ulang agoan bahaso gadis nimora muyu na mago sian bagason takkas nikkomu nadi oban ni anak muyu nadung tarsaat di paradaton ni huta muy. Songoni muse di haroro muyu di borngin ni arion parjolo-jolo buatma lakka-lakka ni burangir dua sarokkap padomu tali ni raja, parokkap adat ni namora, maksudnya ngada lain be namayakkon pakkalpakkal ni adat, ima sinapang nadenggan sarat mangido moof mangido izin, songoni mangotcot dakka ni ulu balang ni raja ulang jalak lulu be di namagona, matakkas ae satottang namangido moof mangi iji dei apalagi hita samo-samo islam tinggal muda hupasari-sari parpayakkni jagar ni opputta raja tobang marjambang dei margading jana marbulele nadi apit ni alaponanadi handing ni durina songoni nadi laungan ni bulungna tarlobi nadi parorot ni parorot –parorot anak bourna taru samarkira maronggur mago sajo silang sae suada mara sian ippol nimata ima taringot di anak muyu najamor-jamo di ari nadung solpu.. Muda adat bacaanta sasue isi surat tembaga holing akkon di tuktukkon mei piramanuk pulungpulunganna nabottar atso adaong upa-upa tondi ni ulu balang ni raja muda nadung kehe manjalaki namagona. Atso malo ibana marpaboa. Tardok namarbona bulu natinggal di desa nawalu bahaso hamu nadung rodi borngo ni arion marsu dohot opput raja tobang namamayakkon sarat sala-sala tinggal muda hubege hata muyu jana rottas unduk-unduk di toru ni bulu, halak namunduk ulan di bunu, songoni marsiabingan kata jana marsituukolan. Suang mei suat di robayan, lambok bulung ni eme Nalam marlayan luyun Lambok lidung binege Nalambok marhalalungun



Apalagi tu opputta raja tobang Gaja ni parsibuhuan nikkomu Namamuat tu kampung saroha Namalo dei palalu ni roha Mambege mula hulak hosa, mula hulak roha satottang mangido moof mangido izin muda namangoncot ulu balang ni raja on hita soranoma tu rajai harana ibana do namarulu balang boti sasue dei di lakka ni danakon di ari nadung solpu nadung di pasahat tu halai, muda dapot disambut halai kirakira manuppak manusum dismadai sambut ki batima hatana. Wa’alaikum salam wr. wb.



KAHANGGI ALUS JAMITA PAKKAL NI ADAT Bahat-baha hormatku tuhamu sude maradu koum sisolkot nahadir di bornginon ni arion, tardiri ma isian dalian natolu nadi panggoari Kahanggi, Anak Boru mora songoni natobang hula ni banua raja songoni koum nami naro di borngin ni ari on hamuliaon ni hata tu opputta raja nasian bagas godang nahadir di bagas namuliaon. Manyambut mambalosi hata muyu nadiudurkon kahanggina nadi jagit anak boruna apalagi nadi parhatutu ni morana. Mulaima sian jamita nilakka-lakka nia nak muyu sogoni namarpaboa bahaso di hamamago ni gadis ni moramuyu sian bagason tutu dei nadi oban ni anak muyu ima tu huta muyu di SIOLIP nadung dipasahat tu natobang muda majol, di borngi ni arion songononma hamu namamyakkon senapan sarat sala-sala ima padan-padan ni opputta raja tobang nadung solpu. Ima namangido moof mangido ijin. Songoni mangottcot ulu balang raja, ulang jalak lulu di namagona muda namangido maaf mangido ijinon, sampemadai tinggal marsapa-sapa di rohakku araniaha adong do tangga ruar di paijur anak muyu sian tangga dapur adong do torang ni ari ngada markirap marronggur, harana I janggal mada mangalusina, tinggal muda dipasari-sari hatamuyu jana rottob. Parudan di dolok Madabu ambalas di siraisan Sahata hamu sapandok Rohamuyu marsijagita. Mangido atso dapot ditarimo di sala-sala ni anak muyu harani naupado hata ni poda, nadi tuturan dei di ari nadung solpu nikkomu mambegeon ro ulala, langlang api surut on muda di surut kon ro mata. Muda ngada disurutkon ro mosok. Muda majolo disambut nasongon salapsap padenggan denggani muda ngada di sambut rosongo sibabandir napaboto-botoon. Apalagi namangotcot ulu balan ni raja, mar pangido hamu atsa di bikkas kon senapan on namarbinanggur tu hasundutan, namanyokkir tu habitcaran atso mambe ulu balan ni raja atsa mulak tu pakkal dalan. On tu rajai doon harana alaido namar ulu balang attong martappunk mei bulung, marbona sakkalan, martalaga juluan, tuhalaima hita soraon, muda dapot disambut halai dohot sambut nami mei sian mora muyu. Wa’alaikum salam wr. wb.



ANAK BORU PAKKAL-PAKKAL NI ADAT Bahat-bahat hormatku tu hamu sude maradu koum sisolkot tardiri mei sian kahanggi anak boru mora songoni mora ni mora natobang apalagi hula ni banua rajan nasian bagas godang. Inda baen namanamba tinggal mangudurkon hata nimora namambalosi hatamuyu kahanggi naro di borngin ni arion ima manyungguli mulai sian lakka-lakka nigadis nimoratta di ari nadung solpu songoni di haroromuy di borngin niarion namanyuangi padan-padan ni opputta raja, songoni sarat salasala mangido moof, mangido izin, songoni mangocco hulu balang niraja. Ima natarpayak di jolo ni raja,



sinapang nadenggan nadi balut ini abit nagorsing, nadi raut nipadang togu. Ngada nikkomu nadi pakosing-kosing, kira-kira adong do nadituju. Attong muda namangida maafon baen madung disambut moratta bobiadope sampe madai tinggal muda hupasari-sari hata ninatobang talu do pittar di baen bisuk dison rupa kenyataan ma harani aha, hami anak boru nasattak do solkotna tu morana harani I muda torang ari hupaligi ligi de pittu ruar ni moratta muda muda marbuka sanga adong namasa namuba rupa anggo puttu luar nagdong namasa namuba, harani I sadarmada roha. Rupa hamu ima kahanggikku pittu dapur di pareso hamu andigan marbukan. Sion ima di paijur hamu gad ini morattaon. Jadi hami indat nimata marnidama, pittu luar songoni namartakan di torang ni ari onma nadidokon bisuk harani i silap nami madai, tai muda sala muyu sian puttu dapur di paijur hamu, di oban hamu di golap niari, haranii ma baen namagido moof komu. Wajar dei harana hamipe songoni de itu moratta salkkon songoni muda ngada hatia nida alai iba, rodei ngada di pakkulikkon halai, attong sampe mei tu hami jamita namangido moofon, harana pakkal ni adat dope, tottu muda tuujung nai adu nasip dopei. Sanga tu iso halaluna, ninna mada rohakku tai muda namangotcot ulu balang ni raja tu halaima hita sorahon muda dapot di tarimo halai dohot tarimo nami mei sian anak boru.



ALUS NI RAJA PARPAYAK NI SINAPANG Assalamu’alaikum wr. wb Manyambut mambalosi hatamuyu koum nami naro di borngi ni arion songoni mandandani hata nadung parjolo mambalosi mulai sian jamita hasolkota songoni namayokkon pakkal-pakkal ni adat ima namangido maaf mangido izin satursna mangotcot ulu balang ni raja ulang jalak lulu be di namgona on hubege madung dapot do on di alusi maradi mora muyu songoni natobang tinggal pangalusina tigor pulos songon lakkitang tigor dei tai tarsahat tu natobang hara niaha lakka-lakka ni danakong nadung saat sanggal tu natobangna di goarmei boru takko harani I ham isian natobang be nadadai napasaratsarat hali namanjalaki sakkalna do. Tinggal parpayak ni sinapang muyu marpakkal jana marujung tu hami pakkalna. Tu hamu ujungnya di song di sapa jolo hamu sanga naujungon di pangalaoh. ALus ni ama topotan. Lambus atso hami pakkali nakkon naujungan dei. Alus ni raja Attong muda naujunagn muyu di pangalaho botodo hamu di mora muyu nusuada harupe songo haruaya namadomu bulung tai suangdo songo tabu di palu dotung-dotung ngada marisi. Haranii muda rohamu saulakan oban komu parsili ni pematang nasabahat-bahat na, parbajuon marbolas-bolas uduran naginjang sidara doli songoni sidara bujing silu namata songoni namasak ihut inatta soripada silang tangan ni anak boru muyu tu pudi timus komu alaman nabolak atso makkobar hita. Alus ni ama topotan Morakku mertua hamu namangido atso marsahala hami namanjalaki. Muda manjadi nadi huta martunas nadi suan dapt bahat parpaan songoni lasniari panjomuran jatu ti bodo rohami salaan, ima marsuo dohot komu maraud morakku botima hatana. Wa’alaikum salam wr. wb.